पुणे : ‘कलेच्या प्रांतात प्रयोगशील नाविन्यपूर्ण असे काही करताना रसिकांची मनःपूर्वक दाद मिळाली, कौतुकाची थाप पडली, की आपली वाटचाल योग्य दिशेने सुरू आहे याची जाणीव होते. यामुळेच सतत नवीन काही करण्यास बळ मिळतं,’ असे प्रतिपादन ज्येष्ठ कथक नृत्यगुरू रोशन दात्ये यांनी व्यक्त केले.
पुण्यातील गानवर्धन संस्थेच्या वतीने देण्यात येणारा नृत्यसाधना पुरस्कार, भरतनाट्यम नृत्यांगना संध्या धर्म यांना देण्यात आला. त्यावेळी त्या बोलत होत्या. रुपये पाच हजार, सन्मानपत्र असे पुरस्काराचे स्वरुप होते. याप्रसंगी गानवर्धन संस्थेचे अध्यक्ष कृ. गो. धर्माधिकारी, कार्याध्यक्ष प्रसाद भडसावळे, गानरसिक रमेश बापट, सुप्रिया मसुरकर उपस्थित होते.
‘गायनाला योग्य व्यासपीठ मिळण्यासाठी सातत्याने कार्य करणाऱ्या गानवर्धनसारख्या संस्थांनी नृत्य कलाकारांसाठीही हक्काचे व्यासपीठ उपलब्ध होण्यास पुढाकार घ्यावा,’ अशी अपेक्षा दात्ये यांनी व्यक्त केली.
संध्या धर्म म्हणाल्या, ‘कलाकाराच्या दृष्टीने त्याच्या आविष्काराला उपस्थित रसिकांनी दिलेली दाद हा खरा सन्मान असतो. अशा पुरस्कारातून अजून काही चांगले करण्याचे बळ मिळते.’
कार्यक्रमाच्या शेवटच्या भागात पं. हरिप्रसाद चौरसिया यांचे शिष्य हिमांशू नंदा यांचे बहारदार बासरीवादन झाले. राग ‘पूर्वी कल्याण’ ने सुरु झालेली मैफल संथ आलापीच्या सुरावटींमधून शांतरसमय वातावरण निर्माण करणारी होती. नंदा यांच्या वादनातून उपस्थितांना विशुद्ध व प्रवाही बासरीवादनाची अनुभूती आली. ओंकार दळवी पखवाजवर, पांडुरंग पवार तबला तर क्षितीज सक्सेना यांनी बासरीसाथ केली. कार्यकमाचे सूत्रसंचालन पियांका भडसावळे यांनी केले.